真心泰國菜館 (已結業)

以前在旺角區居住及工作多年，梗係識得窿路搵平靚正嘅好野食，唔通成日去朗豪坊食貴野咩！所以以前一直有幫襯呢間位於朗晴坊二樓的真心泰國菜，佢抵食得來又幾正宗，因呢間泰國菜係泰國人開嘅。今日重回舊地，見到老闆娘十年如一日咁笑咪咪坐係收銀櫃枱，其他泰國姐姐就如常勤快咁落單及起菜，真係好有親切感。今日先知，原來星期六都有下午茶餐嘅！真係超扺食！$28 生牛肉湯河套餐連飲品及甜品（龍眼冰+$10）生牛河係上枱先浸熟啲牛肉嘅，所以牛肉幾嫰口，最正係個濃湯，超級香濃，啱晒我呢啲重口味嘅人，不過老公就覺得重味左少少。清甜龍眼冰係阿囝超愛，一粒龍眼肉都冇剩。干炒海鮮河粉條套餐$52 （青檸梳打+$5）炒河好夠鑊氣，海鮮料十足，仲好有蛋香。泰式小食拼盤$158呢個係全家至愛，各有喜好。我最鍾意佢個泰式煎魚餅，香辣得來好惹味！阿囝同老公都最鍾意食佢個炸蝦球，外面勁香脆，入面蝦味濃郁，仲好彈牙！其餘嘅泰式春卷同雞翼都相當可口！跟餐餸嗰個粟米綠豆蓉糖水非常之好味！