大餃子 (已結業)

天寒地凍諗住食啲嘢先去見客，剛好見到呢間應該新開的「大餃子」，地方簡潔企理，啱哂！別以為淨係得餃子，佢仲可以配麵，更加估唔到佢有粥食！猶豫緊好唔好食碗粥暖下胃時，又見到佢個「特別推介」酸辣湯和蒜泥白肉，最後我就叫咗個A餐（$55），有齊餃子和酸辣湯，再散叫蒜泥白肉（$45）！餃子有韮菜豬肉、白菜豬肉、京芹豬肉和牛肉大蔥可選，揀了韮菜豬肉和牛肉大蔥（跟餐每隻加$1），隻隻都脹卜卜，餡料好多，味道都唔錯。酸辣湯十分大碗，果然足料，有肉碎、豆腐、紅蘿蔔絲、蔥、雲耳、筍、豬紅和豬大腸等配料，酸辣度剛剛好，飲完個人暖晒！蒜泥白肉的做法也很有心機，相比平時就咁一片片，佢係將片好嘅白肉用青瓜片捲起，食起上嚟樣肉質的軟和青瓜嘅爽口咁混合，增加層次感。而蒜泥再加上特製嘅複合醬料，帶出強而濃既蒜蓉味及輕輕嘅辣度。