八王子居酒屋 (已結業)

前兩日丹麥朋友過黎參加六四晚會（唔係講緊高志活兩個仔），去晚會前去左尖沙咀行街，行到攰果時想坐低飲杯野食下野吹下水，於是諗起上次同朋友去過果間八王子，裝修好有江戶時代FEEL，用來招呼鬼佬朋友都幾有特色。各自先來一杯Asahi啤啤佢先，然後叫左燒雞翼（＄18）+牛舌（＄22）+露荀豚肉卷（＄20），燒雞翼燒得香之餘內質鮮嫩，牛舌都幾有水準，十分夠味。至於露荀豚肉卷又燒得幾香哦，用來餸酒一流。仲叫左個吉列黑豚豬扒 ($55)，香口多汁，外皮都炸得唔錯，夠脆。涼伴鰹魚汁日本矮瓜 ($48) 都係第一次食，味道清甜，行到熱一熱最好先食件矮瓜涼一涼先。而個雜錦漬物 (有黄蘿白、蒜頭、椎山等等) ($58)用嚟送酒都唔錯幾開胃。 本來叫咁多野都係想用來送酒，結果D野食完杯酒都仲未飲晒。去兩次都聽到周圍有人講緊日文，睇來呢間都有唔少日本人來幫襯，連日本人都buy既日本料理，丹麥朋友梗係不停咁讚好啦。