大將 (已結業)

星期六嚟到Popcorn，朋友突然想食打邊爐，於是OpenRice book咗呢間，準時7:30嚟到現場，等咗一陣就可以入去食嘢。揀咗$198（假日加$10）美國嚴選極上牛呢個set，一人一鍋，坐低就會比一底牛肉、一底豬肉片同埋雞塊，我揀咗雞白湯湯底，湯底超香濃鮮味，肉類吸收左濃郁嘅雞白湯，鹹鹹地但係又食到肉嘅鮮味，唔使點任何醬料已經非常美味。但老實說肉既質素唔算好出色，但雞白湯令佢大大加分！自助區拎咗炸雞塊同小食，炸雞塊非常出色，外皮酥脆，表皮夠薄，雞肉非常嫩滑juicy，任食的炸雞有咁嘅質素真係好驚喜；天婦羅炸衣又薄又脆都唔錯；玉子燒甜甜地蛋味夠香；反之日式煎餅麻麻，味道可以，但餅底厚餡料少，食一舊都飽飽地。而其他丸類同蔬菜都係正正常常，冇咩特別。甜品方面居然有窩夫！窩夫係自己倒粉漿落窩夫機，1分30秒食得，我簡左綠茶味，綠茶味同蛋味超香，加埋雲呢拿同朱古力雪糕簡直係Perfect match，食完呢個真係飽住滿足咁返屋企。