柴灣無乜野好食，行過見到地鐵站上蓋間明星有長腳蟹食，於是就諗住去試下。
閒日夜晚，都算有d人架喇，客人都坐左半間餐廳，見到咁多人，應該野食都ok卦
睇到d野都幾抵食，但長腳蟹要成700蚊，兩個人又驚食唔晒，所以點左其他野。
最後點左兩隻大閘蟹、上湯焗龍蝦伊麵底、同埋片皮鴨。
片皮鴨一食$68，兩食好似加$50，如果攞走d肉就加$20。兩個人又驚太多。所以一食就算。
個味其實就無乜野，但片得真係好厚，似鴨件多d。
個皮就唔係好得，好厚，仲要全部切一半
感覺好似膠紙皮咁，好似番蒸再番蒸
好厚既鴨件
龍蝦伊麵好大碟，龍蝦都有6-8件，肉質都ok，味道正常。
大閘蟹就細隻左d
有少少膏啦，但細隻所以d腳都無乜心機慢慢拆，食完無薑茶送，唯有番屋企飲。
原本對呢家酒樓無乜期望，但原來食落都唔算太差，當普通一餐飯食都算幾好，位都闊落幾好坐，有個侍應阿姐好好禮貌又好笑容，下次可以試下其他小菜。
