麻辣派對 (金百利廣場) (已結業)

呢間野我之前喺尖沙咀用外買平台叫過，覺得非常之好食，於是就約姊妹去到佢哋銅鑼灣嘅分店食。我哋係食之前用OpenRice訂枱嘅服務唔單止可以九折仲送50miles，雖然冇特別多但都好似抵左咁。對上一次食嘅時候我哋嗌左魚香茄子，肥腸鍋，口水雞同埋雲南米線。全部都好好食所以我哋今次決定試啲新嘢。我哋揀咗一個水煮桂花魚，呢個水煮魚佢會跟埋魔芋片同埋薯粉。魚嘅份量非常之多，而且唔會話剩係得魚片啲魚腩魚棋嗰啲位都有齊。我哋今次揀咗小辣，大食嘅你如果覺得個魚唔夠喉嘅話仲可以叫啲配菜愛嚟打邊爐。另外我哋仲叫咗個涼拌生腸，呢個非常之好食佢個底仲擺咗一啲青瓜絲，嗰啲青瓜絲非常之辣，食完會噴火㗎呢。最後我都係忍唔住再嗌左個酸菜雲南米線，果然冇令我失望。佢最好食嘅嘢依然係雲南米線。呢間麻辣派對的確係好好食我一定會一食再食呢。