牛摩 (荃灣千色匯I) (已結業)

上次同朋友食完拉麵，原來喺荃灣千色店裏面，都有類似牛涮鍋嘅日式火鍋放題。一入到去當然係要揀湯底同埋揀食啲乜嘢類型嘅牛，我哋四個人就揀咗＄238嘅牛肉，因為一個人叫嗰款，就要全部人都叫同一個價格嘅牛肉。係等湯底嘅同時，我就出咗去自助吧，發現出邊嘅食物包羅萬有！有我最喜歡吃嘅蜆，係可以任拎呀！仲有單骨雞翼同埋自助燒嘅串燒，有雞軟骨同天婦羅。飲品方面，有玄米茶包可以自己沖、不同類型嘅水果沙冰，仲有只要加少少錢，就可以任飲啤酒，啱晒我另一位朋友。我叫左個麻辣湯底其他朋友就嗌左牛乳，豬骨同壽喜燒，各自各精彩，但我略嫌佢嘅湯底未夠辣。牛肉方面侍應都好擔心我哋夠唔夠食不斷有再添幾碟牛比我地，我覺得牛味都幾重，食咗2,3碟都未夠本。食下牛肉，當然要食返啲海鮮，原來呢個海鮮拼盤係包埋喺餐裏面，有海蝦、青口等，都尚算新鮮。但係我哋叫咗一碟之後都冇再返叫，因為已經好飽。出邊又食咗壽司又夾左好多菜其中有舊魚蛋上面印有牛摩嘅樣子，別具心裁。食咗約兩個小時，再叫埋支豆同埋食乳酪雪糕，就圓滿結束。乳酪雪糕奶味啱啱好，加埋粟米脆片，口感清新，將牛味一掃而空。