吃扒 (已結業)

今晚晩餐約咗家姐食，佢搬走之後都冇乜約過出嚟食飯，難得大家都係旺角，同佢一齊食西餐。單點食物加$25轉餐有餐湯，麵包，飲品同埋甜品。煙三文魚牛油果水牛芝士沙律專登點d芝士食，兩個女仔share 食感覺好多咁，唔理得咁多，鬼叫我哋都鍾意芝士。水牛芝士口感有別其他芝士，係比較水份多同一索索嘅texture 。煙三文魚同牛油果份量都多，鋪滿在新鮮沙律菜，連同香滑cream cheese，食完好滿足。牛油果軟殼蟹忌廉意粉牛油果食落好綿密香滑，軟殼蟹香脆，加上creamy 既忌廉，軟硬度適中，又唔會大膩。熱熔芝士紐西蘭牛柳重點上場，一上枱牛柳已經好吸精，然後侍應會淋澎湃嘅熱溶芝士上去，然後自己再淋上自己挑選嘅蒜蓉汁，香噴噴，未食都想象到有幾好味。到切開扒時，五成熟嘅牛柳切開好粉嫩又厚身，好食落肉質好嫩滑，鐵板嘅熱度令肉汁都鎖哂響入面，加芝士奶香同蒜蓉汁帶出牛肉既香味。我哋揀咗薯菜，有薯條，甘筍，西蘭花同洋蔥，同芝士一齊食，太香口邪惡，都唔理得咁多，食完做多d運動唯有。最後食埋甜品，飽到上心口。總括而言，呢度既熱溶芝士扒餐認真唔錯，鍾意食芝士嘅一定要黎試吓，芝士加上鐵板牛扒真係冇得輸。