韓屋

营业中

休息中

好耐冇食韓國嘢，今日同男朋友睇完戲到金巴利道一間差唔多坐滿人既試吓，我地叫左三款食物一齊share。泡菜蒸餃子一碟5隻，食落dd辣，泡菜加上粉絲同豬肉比例一半一半，餃子皮唔會太厚，咬起上嚟唔會散哂，唔配醬油汁都好味。人蔘雞湯泡飯傳統韓國菜式，湯既味道好濃郁，淡淡人蔘味，不苦澀，易入口。糯米飯，紅棗，松子仁等材料放入雞身內一起煮，感覺滋補。一切開BB雞身，d糯米湧出來，BB雞d肉好嫩，已經完全燉腍，好容易拆骨，非常唔錯。人蔘細細條，都幾多，咬落好甘香。原味石鍋芝士拌飯另一傳統菜式，身鍋內充滿芝士，香氣撲鼻，加入韓式辣醬後，將飯同埋其他多種蔬菜材料攪勻，芝士拉絲，盛飯時藕斷絲連，望落去更吸引，食落每啖帶住香濃芝士味，芝士控一定鍾意。不得不提呢個飯除咗白米外還混入左啲紅米，所以啲飯係呈現少少粉紅色，又靚又健康。如果石鍋做到多些飯焦更好。雖然係一間小店，但味道不錯，坐滿客人，下次有機會再黎幫襯。