組長日式放題 (已結業)

再次故地重遊，同一班朋友去食銅鑼灣組長壽司。其實由銅鑼灣地鐵c出口一出去行一分鐘就已經到，地鐵友聚腳真係一流，星期一人流唔多，不過當然都要訂位啦。今次一黎就叫左忌廉溝鮮奶之後再隊罐減肥烏龍茶。鐵板燒就食左牛油炒雜菌同埋金菇肥牛卷，金菇肥牛卷多汁，牛又唔會太乾，做得不錯，好味。火炙壽司食左三文魚同埋海鰻仲有和牛壽司，味道ok, 尤其向大家推介和牛火炙壽司，和牛做到半生熟，雖然簿身左少少，但牛肉味道同醬汁都好配合。好好食。刺身當然係樣樣都點一啲啦，三文魚，油甘魚，帶子，甜蝦，馬刀貝，大家一定要食馬刀貝，好爽口，又鮮甜，推介。但繼續努力食左軟殼蟹手卷同安康魚肝，啲紫草好爽口，啖啖都索索聲，而且魚肝好足料，好飽肚。壽司方面，食左最愛既腐皮壽司，宜家有啲日本餐廳都唔做腐皮壽司啦，可能無錢賺掛，組長的腐皮都okay架。燒物就食左燒菠蘿，牛油燒小蕃薯(必食) ,燒小蕃薯有落糖蜜之外，今次燒得好香口，而且咬落又熱又棉，好享受。仲食左吉烈炸蠔同芝士年糕，炸蠔做得好好，咬落去好多汁。甜品就食左芝麻雪糕同自家製泡芙。味道不錯。九點半之後入座，每人都只係一百六十八蚊加一，好抵。