八鍋堂．中日火鍋專門店 (已結業)

每次諗食乜大家都一定有唔同意見，所以多數食放題或者自助餐，乜都有得食就唔駛煩。朋友話呢間放題除左有日式菜之外仲有得打邊爐，所以就book位試下啦。係兆萬中心3樓，唔駛排隊搭電梯，位置非常方便。一坐低就當然揀左火鍋湯底先啦，佢有得揀4格湯底，好有創意，我地揀左沙嗲，麻辣，蕃茄同豬骨，一擺低勁香麻辣味，佢仲可以揀大中小辣，夠貼心！大陪份火鍋配料都係自己出去拎，食幾多拎幾多又可以樣樣試D，仲有好多飲品揀，連新出既減肥可樂都有，即刻拎返罐試下。刺身種類都多，有三文魚，劍魚腩，赤貝，甜虾，希靈魚，鮑片， 吞拿魚， 榮螺， 八爪魚，新鮮好食，最欣賞佢唔會比少你，寫幾多落幾多。火鍋除左自助果d配料之外，竟然海鮮都有，蜆，蟶子，東風螺，帶子，墨魚滑，勁豐富，有驚喜。牛肉我地叫左個普通牛肉，雖然普通，但質素都唔差喎，肉質鮮美好吃，有牛味，佢仲有隻係貴d，下次一定要試下！其實淨係食火鍋都好飽，太多選擇，但我地都有留少少肚食壽司，燒物同天婦羅。串燒唔錯，即叫即燒，天婦羅都好食，粉唔係好厚果d，外脆內軟。最尾食埋甜品，真係非常飽了，非常滿足。