安南 (又一城) (已結業)

之前都食過一次銅鑼灣既安南，私隱度高，而且環境寧靜一點，服務專業一點。九龍店開左都未試過，點知⋯⋯去九龍塘呢間一定要訂檯，因為好多walk in，要排隊⋯⋯亦都因為呢間家庭客多d，環境相對上係嘈d，而且服務都無甘好，斟水落單都要叫幾次。食物方面，兩家的水準都差唔多，都係有水準的。前菜叫左個燒牛肉青芒果沙律，一般，d牛有點un；招牌浮萍餅、蒸粉卷都維持水準，特別係浮萍餅，雖然只係蒸米糕，上面撒左d蝦粒、麵包粒、蔥粒，食時加少少魚露，簡單清淡，出面好少食到，同埋記得趁熱食！蝦多士就大大塊，不過就油左少少啦！安南仲有樣出面少食到既食物 - 田雞⋯⋯隊長好怕，但家姐同老媽子就好鍾意，佢地叫左個田雞煲仔飯，田雞我無食唔品評，但唔知點解d豉油有色，但一d咸味都無！？牛肉濱海、春卷撈檬、火車頭之中，我覺得火車頭最好味，因為湯底夠濃，牛肉拎到埋黎半生熟，剛好！不過相對銅鑼灣店既服務同環境，九龍塘店還是有待改善，至少浮萍餅要趁熱食，凍左會好糊口，呢樣係銅鑼灣店侍應上菜時既溫馨提示，九龍塘店未做到甘貼心。