湯•米 (已結業)

一路以嚟都好想試下臺灣臭臭鍋，今日終於有機會。2個人幫襯，樣樣嘢都想試下，於是決定叫一個招牌臭臭鍋，再加小食以及飲品。系呢度叫鍋物可以選擇白飯或者粉絲，我哋就決定加$12叫滷肉飯；鍋內食材豐富，肥牛片、豬大腸、臭豆腐、腐皮、娃娃菜、鴨血、芽菜、水晶粉等等，另外再叫咗公仔麵同埋粉絲，兩個人食夠晒飽。臭臭鍋一上枱，就聞到好濃嘅臭豆腐味，係一種香港遺忘已久嘅香味；臭豆腐食落口非常結實，唔會一夾就散，但係亦都有嫩滑感覺。黎得食臭臭鍋，又點少得叫嘢飲，為咗滋潤同埋清新啲，我哋就揀咗爆檸四季春，以及熱嘅蜂蜜綠妍；叫咗少甜所以配合臭臭鍋識嘅時候，就唔會飽飽滯滯，非常適合。值得一提嘅係爆冷四季春，系原過檸檬切頭切尾之後放入茶內，上枱嘅時候對此感到有啲愕然，莫非係驚檸檬味太重蓋個茶味？因為本人較喜歡重檸味，決定自行取出檸檬切細再放返入茶。除此之外亦都想食啲香口嘢，於是叫埋炸魚皮同埋鹽酥雞扒；炸魚皮非常新鮮香脆，亦都夠大塊，令人愛不釋手；鹽酥雞扒香脆大大份，味道適中，肉質鮮嫩，保留豐富肉汁，值得推薦。