峰景餐廳 (已結業)

太太生日選擇咗喺Cafe Deco食飯，我哋訂咗6點半所以當時都冇乜人。餐廳環境清靜優雅，面積都幾大，加上喺20樓有個無敵海景，最衰自己遲咗少少訂位，所以訂唔到窗口位，根據餐廳員工講需要喺三個星期或之前訂先訂到窗口位。我哋order咗六隻蠔，另外Main Course order咗一份香蒜龍蝦扁意粉同一份經典切法西冷扒，加兩份細細嘅兒童餐。西冷扒先到，個扒係已經切好咗，portion唔算大。肉質唔錯兼肥瘦均勻，點埋佢個黑椒汁又真係唔差。個龍蝦意粉真正係個意粉好好食，龍虾味已入哂意粉內，反而嗰半邊龍蝦有少少韌。慢慢食完後order甜品就一定啦，太太見到Menu話有個叫”Homemade Chocolate Heaven”好吸引喎，咁梗係順太太意啦！個甜品係倒啲焦糖落個朱古力球，等佢慢慢融化。入面有脆脆加雪糕球，脆脆味道就好似金莎咁，個甜品係好食但都係甜咗少少。好彩一早已經叫餐廳交喺甜品碟上寫兩個字，所以太太開心指數爆燈喇~