瀧(日韓越) (已結業)

朋友剛從日本返黎講嘢食，搞到自己都想食下日本嘢。之前買餸見到呢個街市有間舖頭有魚生便當，又有韓式和越式食物，選擇多元化，決定一試。海膽三文魚飯魚生同飯份量都好多，除咗三文魚同埋海膽、仲有玉子、螺肉，酸蘿蔔，咩都有d，豐富。三文魚切成一粒粒巨型方塊，好厚身，肥美冇筋，海膽都有一大塊，價錢公道，味道收貨。腐皮壽司一共4件，有三文魚、吞拿魚、明太子及北寄貝沙律4款口味，腐皮甜甜地，每件都爆料，最喜歡明太子口味。七味唐揚炸雞脾炸得幾吸引，皮好脆，雞肉唔會乾，啖啖肉。韓式牛肉炒粉絲同樣份量超多，我哋兩個人一齊食，最終只可以食一半，好多料，好多肥牛，其他配料仲有冬菇片，紅蘿蔔絲，菠菜等等，價錢好抵食。食唔晒放雪櫃，明天又可以再食。