小火焰韓式咖啡廳 (樂富廣場A區) (已結業)

一去到呢間餐廳嘅第一個印象就係佢個門口同樓底都好高！一去到張枱已經擺咗一大疊嘅餐牌，我同朋友淨係睇嗰疊餐牌都睇咗好耐先揀到自己想食乜嘢。朋友點左鰻魚烏冬套餐。本身係蕃茄湯，朋友就改咗豬骨濃湯。佢話個湯唔濃豬骨味，但係個鰻魚就好好味。我就點咗韓式芝士炸雞。一份食唔晒所以點咗半份。半分炸雞有四大塊，我一個人都食唔晒，要同朋友share。芝士醬同芝士粉味道濃郁，雞塊本身都好有味，炸得好香脆。朋友嘅午市套餐加錢點咗杯紫薯拿鐵。紫色嘅latte好靚，有淡淡嘅紫薯味. 呢杯曲奇朱古力沙冰特飲就真係好驚喜。一上枱嘅時候見到咁大嘅size同咁靚嘅外表就「嘩」咗一聲。就咁飲啲朱古力沙冰就冇乜特別，要一路食佢上面嗰塊Oreo餅乾，一路飲沙冰。好似食緊曲奇餅雪糕咁，好味好多。除Oreo餅乾外，上面仲有一條朱古力餅乾條，一啖餅乾條，一啖朱古力沙冰特別滋味。杯沙冰真係好大，其實淨係飲杯沙冰都可能會飽。