任點美食 (已結業)

同同事過去灣仔嘅地盤行site，爬貓梯爬到攰攰地，睇完都11點9，不如係附近食埋lunch。記得之前黎過灣仔有間叫笑面虎車仔麵幾好食，食過翻尋味，點知去到時已經人去留空，疫情令好多餐廳都捱唔住要結業。 冇左一間車仔麵，取而代之嘅係另一間車仔麵。招牌寫住任點美食，懶得改舖名 🤣，睇完餐牌就知舖名改得冇錯。點餐形式同大型連鎖快餐店一樣，喺門口點餐再自取。舖頭裝修非常簡約，可能將裝修嘅成本擺去食物度~ 餐牌嘅大部分都係車仔麵嘅餸，總共有四十幾種餸，「任點美食」果然冇改錯名。傳統車仔麵嘅餸應有盡有，仲有特別嘅餸例如日式豬軟骨、日式叉燒、豬手等等其他配料可供選擇。 「咇咇咇」！聽到提示器嘅聲響，就知我嘅車仔麵已經準備好！ 日式叉燒、炆花菇、鮮蝦卷、沙嗲汁油麵 $48車仔麵擺盤賣相比想像中出色！一碗車仔麵俾左6、7隻炆花菇，非常慷慨，太多食唔哂要俾1、2隻同事share 😂 不過略嫌炆得唔夠入味。 試埋日式叉燒，講真就一定冇日式拉麵店嘅叉燒咁好食架喇，不過都算唔錯嘅！鮮蝦卷就係街市買到嘅蝦卷，不過不失。 呢間任點美食嘅車仔麵絕對可以成為灣仔區打工仔嘅飯堂！日日「任點」唔同車仔「美食」！======