牛扒先生 (新都會廣場) (已結業)

今次黎到葵芳新都會既mr steak試佢既半自助晚餐，同屋企人預早慶祝父親節，揀度到其中一個原因係貪佢既食用時間都算長，book左6點半開始，可以坐到9點幾。令我驚喜既係呢到既沙津吧相當不錯，甚至比主餐更出色。除左有各款不同款式既沙津，仲有煙三文魚等等，同埋甜品方面都有唔少種類，有一般嘅cheese cake同麵包布甸等等，令我出奇嘅係竟然有豆腐花。講咗咁多沙律吧，主菜方面我就叫左精選烤肉盤set，有羊鞍、牛扒、春雞、肉腸同薯蓉。各樣肉方面其實都中規中矩，相對沙律吧唔算太有特別，反而係薯蓉做得幾出色。 成個用餐環境其實都幾舒適，唯獨有點美中不足嘅係餐飲方面，印餐牌上係寫咗有特選飲品，正當我同屋企人喺度諗緊個杯可以叫咩嘅時候，原來店員已經係神不知鬼不覺嘅時候將個杯特飲放咗喺我哋枱面，而叫餐途中冇問過我哋飲咩，我哋仲以為嗰杯係普通嘅餐茶，追問店員之下先知道嗰杯原來係果茶，仲要冇得選擇凍定熱，分量亦唔見得多。總括來講，以西式半自助晚餐來說價錢唔算十分昂貴，但質素亦唔見十分好，質素算係中規中矩，係環境上唔錯，幾適合同朋友或者屋企人坐低慢慢食談天說地。