想念日本嘅日子，一於去道頓堀，自己整！
餐牌分御好燒、廣島燒、文字燒、炒麵炒飯、鐵板燒、班戟，每個種類更有肉類、海鮮、芝士、蔬菜等配料選擇，每客定價約$78-118不等。幾款分享套餐包含御好燒、鐵板燒、前菜、甜品同埋飲品，價格頗實惠，而且配搭多，係不錯選擇 👍
另有120分鐘放題，有38品、57品及75品，分別$198/$258/$328每位，小童長者更有優惠價，最啱長期餓底嘅朋友，可以一試。
餐牌更有每種食品嘅製作步驟，以及所需時間，掃QR Code仲有簡單影片介紹，清晰易明，唔識煮野食嘅我都冇問題 💪🏼
=========================
道頓堀雜錦文字燒 $98
眼見「廣島燒」步驟相對複雜，今次試試簡單嘅「文字燒」先～ 先將蔬菜拌炒後做成圓形，然後喺蔬菜配料中間挖個窿，將水水的麵糊倒入窿中間，當麵糊唔再流嚟流去就食得 👌🏼
估唔到「文字燒」底部能形成鍋巴，焦焦香香，但唔能夠調節鐵板溫度嘅關係，放喺鐵板上面未食嘅「文字燒」，燶得好快 😕
配料有：五花腩、魷魚、蝦，味道一般般，豬冇醃，海鮮有雪味
軟芝士厚燒班戟 $68
職員細心清潔鐵板，再上班戟 👍
職員提醒如要流心效果，每邊煎2分鐘，將麵糊整到約一吋厚。
可惜蓋上鑊蓋後，班戟扁咗，口感似麥記熱香餅，不過不失 🤔
由於未達每人最低消費$100，店員建議我哋嗌多杯嘢飲，我哋叫咗凍烏龍茶（$15 ）及百事可樂（$15）。
整體來講，好玩、容易操作，而且可以試到自己手勢 😆 不過抽氣通風麻麻，整嘅時候煙霧離漫，頭髮同衫吸滿氣味。雖然餐廳提供衣服清新噴霧嚟治「標」，但係如果可以改善個「本」會更加好。
=========================
道頓堀御好燒專門店 (黃埔天地黃埔號)
📍 紅磡黃埔天地黃埔號(第6期)AEON Style地下G01號舖
