有骨氣火煱專門店 (已結業)

平安夜果晚同班朋友去慶祝，有時段所限只可以兩個鐘，我o地食7時半至9時半。17個人食可以叫三鍋湯底，三鍋都係豬骨湯底，湯底D料有唔少粟米、蘿蔔、豬骨，個湯亦好甜，就算食都要加水，都係加好似豆漿顏色的豬骨湯，唔係只加滾水，而d豬軟骨膠膠o地感覺好食。因為多人關係，點了好多好多野食，好多火鍋配料都唔錯，黑色牛拍葉、魷魚、炸魚皮、菜……。四寶丸-係手打的，新鮮彈牙，尤其係墨魚丸；手唧魚麵-其實係魚肉，唔同的係唧出o黎，幾得意，同魚肉又係另一種口感；紫菜墨魚卷-係紫菜包住d墨魚肉，其實都唔差，d墨魚肉好爽好彈牙，不過個人感覺紫菜係脆先好食，腍左就冇咁好。麻蓉包-以為係酒樓點心個隻，原來係做o黎打邊爐，熟左之後外形似水晶飽，味道又咸又甜，覺得怪怪地；糯米肉丸-外層拈了糯米，內面係肉丸，就算熟了後，個層糯米都係硬硬地，好似唔多熟，唔係咁好食。仲有肥牛，雖然我冇食，不過見叫了兩大碟都清晒，我估都應該唔錯的。因為credit card 有85折，埋單都係每人$110好抵食，仲平過之後我們去唱k的價錢。不過可能我o地冇叫茶，因為茶錢都要12蚊一位，叫啤酒汽水仲抵。