韓閣 (富裕樓) (已結業)

一個武漢肺炎，搞到大家冇得出門😭，唔知幾時先可以再去韓國，唯有去呢個韓閣，食下韓食，止下咳😂。呢度走大眾化路線，好受年青人歡迎，非常旺場。見到枱枱都叫炸雞，海鮮煎餅，真係口水都流埋🤤，不過一條友點食得咁多，唯有叫碗秘製水梨辛辣冷麵，冷靜一下😆。冷麵選用韓國蕎麥麵，非常非常煙韌，要出力咬先至咬得斷，所以上枱時會畀埋把較剪你，以備不時之需。冷麵嘅配料主要有半隻蛋，水梨，青瓜絲同埋泡菜，撈埋韓式辣醬一齊食，感覺非常清新。如果覺得太辣，呢個時候，水梨就大派用場：大長今都有教，水梨可以解辣呀😆；如果覺得唔夠酸，可以落埋少少醋，味道就即刻提升。麵嘅底部鋪滿冰塊，麵條得以一直保持住冰涼嘅感覺，一啖入口，簡直透心涼，實屬消暑佳品。結果嗰日我一路食，個鼻就一路係咁塞😝。