源記甜品專家 (已結業)

嗰晚同朋友喺附近食完豐富西餐，拐過彎就到源記，食到幾飽都要食碗糖水先圓滿。我叫左最愛嘅桑寄生蓮子茶，今次飽得滯冇加蛋。水準依然，桑寄生並無苦澀味，蓮子仍舊香甜鬆化。其實加隻蛋嘅話，成碗糖水香味即時提升，佢哋啲蛋係入晒味，下次記得留肚加蛋。朋友叫咗燉蛋，見到個蛋滑溜到反晒光，一啲凹凸洞都冇，我都忍唔住食咗幾羹。蛋，香而不膩，滑到可以直接流入喉嚨，加埋嗰少少薑汁味，完美！招牌雞蛋糕，如果你將呢件蛋糕同而家千變萬化嘅西餅比較，你一定會失望！雞蛋糕出名之處係無添加，絕無花巧。係食嗰種昔日簡單嘅味道，淡淡清蛋香。由於無添加，食落唔算特別鬆軟。你可以試吓一啖糖水，一啖蛋糕，咁樣食又有另一種風味！