巴巴串 (已結業)

觀塘工廠大廈入面不嬲都有好多好嘢食，今次發現到駱駝漆嘅呢間串燒放題，任食兩小時都只係$238，而家晚市仲有送芝士焗龍蝦、泰國大頭蝦同新鮮鮑魚，絕對係物超所值！串燒嘅選擇非常多，肉類有雞肉、豬腩肉、牛肋條等等。丸類除咗墨魚丸、牛丸、燒賣之外，仲有芝心丸、龍蝦沙律丸同魚肉春卷。至於蔬菜類就有雞髀菇、蕃茄仔、秋葵、翠玉瓜等。最有驚喜嘅一定係海鮮類！大大粒嘅帆立貝、大蜆、青口同墨魚仔都可以任食！依間餐廳嘅特別之處，在於將串燒放上烤爐之後佢會自動旋轉，令食物受熱更均勻又唔怕燒燶晒，雖然燒嘅時間相對耐少少，不過唔緊要因為餐廳仲有熟食可以任食！熟食嘅種類亦都五花八門，有前菜類嘅泰式鳳爪、炸雞軟、滷水雞翼，亦都有主菜類嘅牛肉漢堡、BBQ豬肋骨、卡邦尼意粉等等，甚至連蒜蓉焗蠔都有！可以話熟食都同樣出色。到最後甜品除咗串燒嘅燒菠蘿同棉花糖之外，亦都有馬卡龍、小蛋糕同各款杯裝雪糕，特別推薦沖繩海鹽味！兩個鐘入面，可以話係咁食，環境乾淨座位亦寬敞舒適，仲有大大間房可以book嚟開party，絕對係性價比極高嘅選擇。