紅樹林 (已結業)

星期日凌晨我捱更抵夜睇阿根廷對墨西哥嘅比賽，估唔到要打到加時先可以收工。踢完差唔多成六點，一覺瞓到成兩點幾，好彩友人借宿一宵，使到我可以同阿K食番個tea。原來阿K煲電視劇煲到差唔多成五點鐘，我上到佢屋企仲瞓緊。冇壞，梳洗完啱啱好食得tea。阿K話想去陳意齋買口“立”濕，所以我地經過呢間餐廳。呢間餐廳原來有直播世界杯十六強頭場賽事。廂座好闊、舒適，坐到我昏昏欲睡。我地各自嗌咗tea set，阿K叫咗海鮮炒意粉，我就叫咗薄餅飽。碟海鮮炒意粉麻麻地，太濕，應該啲急凍海鮮冇出水就落鑊炒。攪到啲意粉淋“謝謝”。薄餅飽就比較好，麵包唔會焗得太硬，配料有火腿、芝士、洋蔥等標準嘢，唔花巧，作為一份輕便嘅tea不俗。我地一路食tea，一路睇住大電視播放有線陳年舊片，由譚校長主演嘅“黃飛鴻笑傳”，笑吓、食吓，輕輕鬆鬆好自在。埋單五十有找，都覺得唔錯。