花臣車仔麵 (已結業)

某一日係旺角搵野食時見到一個好獨特既餐廳門面，俾佢個名吸引左，就入左去食呢間車仔麵睇下有咩花臣。一入到門口先落單，再去取餐搵位坐，餸有好多選擇，唔只有傳統車仔麵既配料，仲好多特別既，例如有日式叉燒，玉子蛋，豬手，墨魚餅，真係會企係門口諗好耐。最後選擇左豬軟骨玉子蛋同腐皮墨魚條，湯底就麻辣湯加辣醬。店內有隻白兵拎住外賣鎮守鋪頭，一開始俾佢嚇親，但之後好似一路望住佢食野都幾特別。講番碗車仔麵先，比我想像中好食，有驚喜。湯底方面個麻辣湯不過不失，但辣醬有加分，食落唔係得個辣，有其他材料去提升左個味道。配料方面，豬軟骨都幾腍，但有部分肉就有啲柴，個人就推介玉子蛋，大大舊而且味道非常好，好有蛋味同埋甜度適中！食完發覺餐廳名果然無改錯，一碗車仔麵都可以搞到咁多花臣，配料多種類，配搭新穎，環境特別，如果食厭傳統車仔麵既朋友，推介黎試一試。