漁樂 (喜薈商場) (已結業)

作為一個經常係長沙灣打滾嘅人，見到新開嘅餐廳越來越多，梗係要去試下唔同嘅餐廳。之前聽朋友話呢間餐廳都唔錯，一路未有機會食嘅我，呢日就自己去左試下佢嘅下午茶。真係唔知係咪我咁唔好彩，一試就係伏冇食午餐嘅我諗住叫左飽肚嘅麵黎食，諗住食泰式炒金邊粉實冇死啦，點知就都係踩中左地雷。首先個炒金邊粉真係好油，雖然所有炒野都係油多嫁啦，但我都真係未食過一個咁油嘅金邊粉，睇到樣相咁"令"就知道佢真係好油，食入口啖啖都係油。第二係佢真係好甜。本身炒金邊粉係酸酸甜甜嘅，但佢嘅甜係遠超越過酸，冇得用酸味中和返成個麵嘅甜度同埋油膩感，令到成個麵真係好漏。我平時都盡量唔希望浪費食物，但真係冇辦法。唯一可以讚嘅就係佢份量極足，我估唔到下午茶會有呢個份量，但因為佢實在太漏嘅關係，呢個優點即刻變成左折磨。我食左成個麵嘅最多六分一之後就已經頂唔順，冇辦法再食落去。中間我不停飲野中和下個油膩感，但係呢個凍奶茶其實都唔係好掂。佢嘅奶好多，茶太少，好似飲緊淡奶咁，同埋佢又好甜，完全唔似港式奶茶。只係因為佢唔油，所以我都不停飲，希望可以盡量食多D個麵。呢一餐真係食得好唔開心。希望只係我咁岩揀錯野而唔係所有野食都係咁嘅質素