越味皇 (已結業)

每次經過呢間越南餐廳，入面都好多人要等位，今次竟然仲有兩個位淨，即刻入去試下啦。椒鹽炸軟殻蟹新鮮即炸超好食，唔會太乾有少少汁，軟殻蟹有蟹膏，好惹味。燒豬頸肉正！又係即叫即燒，味道不錯，豬頸肉外脆內嫩，仲要係厚切，有驚喜！生牛肉湯河湯底超正，唔係味精湯。河粉薄而且勁滑，帶少少煙韌。生牛肉份量非常多，牛肉有鮮味肉甜。配料方面有生洋葱，葱花和大量銀芽，仲有青檸同辣椒，誠意之作！燒蝦濱海越南特式菜，用米粉絲整成一塊餅皮，入口軟滑，感覺幾特別。燒蝦仲係已經剝好皮，非常貼心，蝦肉爽口彈牙，新鮮好吃。蝦頭膏炒高麗菜以為會好咸好重口味但又唔會喎，蝦頭膏勁惹味，配搭比較清淡既高麗菜，又幾好食喎滴漏咖啡離遠已經聞到好香咖啡味，咖啡底落左鍊奶，記得撈暈先好倒落隻杯度鹹檸梳打成枝梳打上，飲幾多倒幾多，就唔怕飲飲下唔凍啦，正！