越味皇 (已結業)

路德圍係荃灣其中一個美食集中地，咩菜式都可以係到搵到，今日就同朋友去食越南菜。一講越南菜就令人聯想到越式春卷，檬粉呢d 招牌菜，但其實仲有好多特式野食，呢間餐廳都有唔少正宗越式菜。餐廳佈置都幾有越南風格，成個天花都用左越南草帽黎佈置，而且位置都幾闊落。餐牌食物種類非常多，差唔多所有特式越南菜都係晒到，我地嗌左個牛油果軟殼蟹紙米卷做前菜，紙米卷非常足料，味道亦好清新，配合埋甜酸醬，非常開胃。再黎就係串燒，叫左半打，半雞半牛，新鮮燒好，加埋沙嗲，有乜可能唔好食。燒牛肉濱海，濱海係越南特式既食物，用生菜夾住米粉加上牛肉，再撈埋d 甜酸醬食，口感非常豐富，而且味道好濃郁。食左咁多肉，當然要食返個菜，我地叫左個蟹頭膏炒高麗菜。成道菜非常香，份量又大，高麗菜吸收晒所以蟹膏精華，非常惹味。最後當然唔可以唔飲返杯越式咖啡啦，滴漏咖啡非常香濃，鐘意飲咖啡就一定要試下。