越南米紙 (已結業)

最近樓下商場新開咗一間越南餐廳，一直躍躍欲試，某日趁朝早有時間，就落咗去試下。呢間餐廳舖位唔大，座位也不多，不過由於時間尚早，唔駛等就有位了。坐正喺窗邊，碰巧天氣都唔錯，難得可以曬住太陽食早餐都幾有feel～早餐有得揀麵包、米紙卷、越南河粉等等，我比較想食三文治類，就揀咗個綜合越南麵包。綜合越南麵包佢係法包入面夾咗扎肉、肉碎、菜絲等材料，即係越式風味嘅三文治～同埋有我好鍾意食嗰啲酸酸甜甜嘅蘿蔔絲，爽口又開胃。呢個包望落唔係好多，但食落都幾飽，對我嚟講做早餐剛剛好，加多杯咖啡慢慢嘆，望下窗外面啲木棉仲飄緊，過返一個休閒上午。之前見夜晚都幾多人排隊，下次再落嚟試下晚餐～