越北牛肉粉專門店 (已結業)

返工悶悶哋喺下午茶時間走咗去新都城買零食順便食晏，由於天氣太熱，我哋又懶唔想行，揀咗喺零食店隔離，口感清淡適合夏天食嘅越南餐廳食嘢。下午茶時間客人唔多，食物價錢同普通午餐差唔多，都係粉類飯類，份量亦唔算少。我哋追加咗三款小食，每份兩件，唔夠Share。蜆港炸蝦餅，大概係一塊豬扒大細，斜切薄片，爽口但唔似彈牙嗰種。河內炸春卷，一大件一開二，又熱又脆。順化香茅雞翼，外表乾身，裏面仲保持唔太乾。順化香茅牛肉撈檬粉，魚露喺每張枱有一樽，鹹淡自己調味，自我感覺清新健康。越式烤豬頸肉配飯，豬頸肉稍乾無平時食豬頸肉嘅油膩感，飯要靠醬油調味。海防蕃茄牛腩湯金湯粉，食得湯底少調味，清新嘅蕃茄味，牛腩半肥瘦，份量較少，整體無特別。椰汁綠豆冰，椰汁紅豆冰試得多，第一次綠豆味，飲成杯打成沙冰，綠豆味更清涼。