越泰 (已結業)

上環地鐵站出口附近有間賣相唔錯既泰國菜，鐘意不停試新野既我又黎試試。泰式無骨海南雞飯 - 賣相還可以，雞身質地都算滑滑，只係個醬汁唔覺有咩特色，好既醬汁係可以提升主食既味道，但佢做唔到。雞油飯有味，但都似可以油少少，濃味少少會更正。冬陰公酸辣海鮮湯金邊粉 - 喜愛飲冬陰公既我最鐘意冬陰公湯河，一次過滿足醫肚同飲冬陰公兩個願望咁。今次依個海鮮金邊粉個湯底都係唔夠味，唔夠酸唔夠辣、南薑味香芧都唔夠，而且海鮮份量唔多，總體感覺只可以比勉強合格。越南春卷 - 春卷入面材料唔夠多原素，感覺唔夠豐富，不過都炸得香脆。