越南米紙 (已結業)

今日同朋友去九龍灣搵嘢食，我哋行到去淘大商場附近，去咗對面嘅安基商場，見到有間新開嘅越南嘢，就去試一試。 入邊人數唔係好多，裝修都幾靚，同坐得幾舒服，我哋叫咗個生菜包香料新鮮豬肉碎，越式生牛肉湯河粉加安南炸春捲餐，另外叫咗一個椰青同薄荷葉青檸梳打。 等咗五分鐘，椰青同薄荷葉青檸梳打首先送上，個椰青好大個入邊啲肉都幾新鮮，而個薄荷葉青檸梳打，薄荷味好濃同個杯設計幾得意。 之後春捲同湯河都送上，啲生牛肉好嫩好滑，同個湯底好濃，啲河粉好有味唔需要落好多配料，啲河粉質地都好好食。個春捲畀我哋想像中大舊，個皮炸得好脆，味道不錯。 之後到生菜包香料新鮮豬肉碎，佢個碟都幾得意，啲肉份量都唔少，啲肉碎肥瘦適中，辣味亦啱啱好唔會太辣，再加上啲少少甜嘅蘿蔔絲，包落個生菜度，味道好豐富。