海鯛魚湯專門店 (已結業)

朋友在鰂魚涌地鐵站呢頭返工，今晚約咗佢喺呢度附近食晚飯，見到呢間<海鯛魚湯專門店>係新開張，門面非常光猛，餐牌上面嘅日式鯛魚湯烏冬，同埋日式定食、刺身丼飯等，價錢同款式都非常吸引，當然要試下啦！餐廳入面環境確係唔錯，座位非常寬敞舒適。先來一客<鯛魚片湯烏冬>，價錢都係六十幾蚊，份量唔少，魚片都有好多塊，又厚又多肉，魚嘅肉質入口非常之嫩滑，而且仲要冇骨，食落去啖啖肉，配埋奶白色嘅新鮮魚湯，非常鮮甜，而且烏冬入口亦都煙韌彈牙，整體嚟講非常好食。<三文魚赤蝦丼飯>赤蝦非常之大隻，蝦肉亦非常鮮甜彈牙，而且三文魚都非常新鮮，最重要係連飯都可以加大，而且唔需要額外加錢，配埋麵豉湯，非常完美。小食叫咗<日式炸餃子>，外面炸得非常香脆，入面嘅肉仲好juicy。<日式炸雞>同樣炸得香脆金黃，而且雞肉非常之嫩滑，重帶有肉汁，抵食又好食！另外仲叫咗杯日式咖啡，咖啡味香濃，帶有咖啡同埋奶嘅香滑味道。整體來講，餐廳嘅食物質素確係非常之唔錯，而且價錢亦非常抵食，環境氣氛舒適，值得再來！！