帝樂德國餐廳 (Fashion Walk) (已結業)

一直都好鍾意食德國嘢，但係香港正宗嘅德國餐廳唔多，最近經過銅鑼灣，見到呢度有間歷史悠久嘅德國餐廳，而且入面仲有好多人食，咁就一於去試吓啦。本身已經好鍾意食芝士，呢度嘅芝士拼盤賣相非常靚，咁就叫咗黎試啦。而且因為打算飲熱紅酒，紅酒配芝士真係一流。呢度嘅芝士有幾款，我自己就最鍾意食呢個藍芝士，鹹鹹地越食越開胃。見到好多人都食緊德國豬手，而且好大隻，咁我哋梗係叫黎試吓啦。一上枱豬手真係大得誇張，而且外皮非常脆，平時會覺得德國豬手有時會太鹹，但係呢度調味得啱啱好，而且肉質好嫩，完全冇豬手比較柴皮嘅感覺。我覺得飲品方面最抵讚嘅就係呢個熱紅酒，飲落酒味好足夠，而且非常香，非常適合聖誕節或者冬天飲呀。呢間餐廳又靚又正宗，而且臨近情人節，佢有好多情人節嘅佈置同埋氣球，非常推薦大家嚟慶祝節日呀。