Error 19 (已結業)

啱啱做完facial，諗住搵個地方食嘢近近地，係726呢度，全棟都有嘢食，見到呢間新開靚裝，就食呢度啦！上到黎，有超靚打咭位，食裝修都已經夠正！好，坐低睇下有咩好食先。香辣檸檬海鮮意大利麵，意粉炒得好夠乾身，食落有咬勁，海鮮有蝦、墨魚、魷魚，辣味充足，仲用左蒜片去爆，好香口，蒜片冇左強烈嘅味道，可以食埋添！叫餐自動跟湯同沙律，好抵食，個湯好濃稠，好飲。飲品叫左芒草洛神花，顏色有層次好靚，搞匀之後味道酸酸甜甜。宇治抹茶十勝紅豆梳乎厘，暫時係我食過最好食嘅梳乎厘，有空氣感，軟綿綿，又食到蛋白香，上面個忌廉，重奶油味，好creamy。配角蕨餅、抹茶啫喱、紅豆都係無得輸。