元洲牛肉麵 (坑口村) (已結業)

平時都有聽過元洲牛肉麵呢間餐廳，而家仲有一間分店喺坑口，所以夜晚就同媽媽嚟試吓。有位女店員非常殷勤，會細心介紹餐牌同嘢食。嘢食方面好多選擇，估唔到除咗牛肉麵，仲有好多串燒可以選擇。〈總裁牛肉麵〉呢一款就好似大雜燴一樣，有牛肉、牛筋、牛舌、兩款牛丸，可以一次過試晒唔同部位，所有牛嘅部位都超軟淋，一咬就會斷開，而牛丸超級Juicy，好正！而湯底就好重藥膳味道，非常滋補。因為店員推介，試咗唔同串燒，仲有中華沙律同枝豆做前菜。〈蒜蓉牛油金菇〉店員會將Gas爐啊放喺你面前，然後再將裝有金菇同粉絲嘅錫紙兜，放喺面前一邊滾一邊食，濃濃蒜香味。〈紐西蘭青口〉一份青口有三隻，放滿蒜蓉醬，好香口。〈厚切牛舌心串〉〈黑毛豬肉串〉〈羊肉串〉三款最推介係牛舌心，選用左最嫩滑嘅位置，爽口得來又有質感。〈原條茄子〉原條茄子燒完上面放滿蒜蓉醬，食得好滿足，茄子又新鮮，非常清甜。〈原個椰青沙冰〉將椰青打成沙冰再放入原來嘅椰青入邊，解暑得來又有口感。