由於提早同細表姐夫慶祝生日，所以我們今晚去咗長沙灣日暉商場嘅「百勝海鮮酒家」食晚飯慶祝！
我們叫咗個「闔家歡樂宴」五福臨門燒味盤係有蜜汁叉燒、香脆嫩滑嘅燒肉腩仔、新鮮即燒嘅燒鵝、爽脆清新嘅青瓜同爽滑嘅黑木耳！
美國龍蝦伊麵「半席兩隻，一席三隻」，我們叫咗係一席，所以有三隻龍蝦，
而且他們將啲龍蝦斬開比較細件，最啱啲貪靚嘅女士們食，唔駛將個口張到好大而影響儀容，仲係好細心呀！
至於龍蝦嘅肉質就好爽甜彈牙，而且相當新鮮同份量十足！
碧綠花姿蚌片嘅花姿好爽滑，象拔蚌片亦爽脆，而且份量亦都係超多，平日食嘅通常都係西蘭花或其他蔬菜嘅份量比較多，但呢度係調轉㗎，真係好抵食呀！
黃金沙律海鮮卷嘅外層炸粉唔會好厚身，而且炸得好金黃香脆，食落酸酸甜甜，感覺好清新！
紅燒瑤柱鷄絲翅嘅濃稠度調教得恰到好處，唔會過稠或過稀，而且材料亦都幾足料豐富！
清蒸大海石斑蒸嘅時間火候控制得恰到好處，肉質好結實彈牙，而且斤両十足！
蠔皇花菇鮑螺片嘅花菇相當軟滑厚身，而且燜得好入味，鮑螺片亦好鮮味彈牙！
一品脆皮燒鷄燒得外皮好香口脆身，肉質好軟滑，而且好肥美大隻！
櫻花海鮮炒飯炒得好夠乾身，而且粒粒分明，
餡料除咗有鮮味嘅櫻花蝦之外，仲有爽脆嘅芥蘭頭粒，而且師傅仲將啲芥蘭去咗皮再切成粒，
令到食落去唔會有根，真係非常貼心呀！
