陸陸雞煲火鍋 (已結業)

天氣開始稍涼， 自然令人諗起雞煲打邊爐， 今晚約咗個朋友去我其中一間最鍾意嘅雞煲食晚飯， 堅餐廳宣傳緊一個雞煲海鮮套餐，即刻試一試佢先。首先講下個套餐有咩嘢食，先嚟前菜冰鎮花螺， 爽口又甜開胃一流。 跟住到雞煲， 唔似平時啲雞煲咁一味得個辣字，陸陸雞煲嘅雞麻辣味香味並重，而且雞肉嫩滑又入哂味，非常惹味。食完雞煲後就煲打邊爐，打邊爐湯底係龍蝦湯， 手臂咁長嘅龍蝦淆製而成嘅湯，非常鮮甜，龍蝦肉又爽又甜又彈牙，一流！ 個海鮮拼盤真係不得了總共有八種唔同嘅海鮮， 分別有聖子皇，鮑魚，貴妃蚌，虎蝦，廣島蠔，帶子，花甲同鯇魚，份量非常多，而且係勁新鮮，隻鮑魚黎到果時仲係郁下郁下既。味道都非常出色，尤其聖子皇同鮑魚都大大隻勁鮮甜，同個龍蝦湯簡直係絕配。 上埋火鍋配料，火鍋配料同樣豐富， 手打蝦丸墨丸豬肉丸有誠意都用料十足，4款唔同既餃都皮薄餡靚，牛肩片豬肉片都好好味，菇同菜都新鮮。最後送埋甜品，貼心呢一餐非常滿足，份量豐富得又有多重既味覺享受，無食一排陸陸雞煲依然出色，入冬後要再食多d。