檀島咖啡餅店 (軒尼詩道)

营业中

休息中

由於今日中午我們要喺灣仔附近做嘢，但因時間仲早，所以我們就喺軒尼詩道嘅「檀島咖啡餅店」食咗個午飯先！我們叫咗幾個常餐：沙嗲牛肉公仔麵拼腸仔煎太陽蛋嘅牛肉都算軟滑，但沙嗲醬嘅味道就超級鹹，至於腸仔煎太陽蛋就不過不失！鷄絲湯通粉拼炒雙蛋嘅鷄絲肉質比較「粗嚡」，而且再淋上咗啲忌廉汁喺面，令到食落覺得好膩同好滯，至於炒雙蛋亦炒到過咗火，所以質感比較「老」同唔嫩滑！豬扒湯公仔麵拼吞拿魚奄列嘅豬扒肉質都幾鬆軟，而且有兩塊咁多，至於吞拿魚奄列就感覺怪怪地咁，鷄蛋亦唔嫩滑，吞拿魚嘅味道就極之腥，再夾埋一齊食，感覺真係超級錯配呀！另外！喺食到一半嘅時間，突然有隻超大兼且係會飛嘅「小強」飛喺我手上，之後再飛去其他人客身上，嚇到我們個個當場成個跳起同大叫出嚟，本來我們已經覺得極之不滿㗎，但最令我們更加反感嘅係，其中幾個店員竟然話：「駛唔駛咁誇張咁大反應呀，祇係飛曱甴之嘛！」！聽到他們咁講之後，我們真係覺得超級唔滿意同埋決定以後都唔會再嚟！