長阪燒 (已結業)

今日喺旺角購物，順便辦年貨，行到攰想搵個地方坐低，舒舒服服咁食個晚餐。喺朗豪坊附近，見到有個餐牌，原來有間日式隱世樓上鋪，見到啲相好靚，所以決定上去食個晚餐。首先嚟一碟「日本生蠔」，生蠔嘅味道好濃郁，鹹鹹哋，仲有海水味道，一啲都冇腥味，好鮮甜，超正。接着叫咗1份「蟹肉水菜沙律」，好多蟹肉，好足料。「雜錦天婦羅」，以蔬菜為主嘅天婦羅，炸到脆卜卜，外脆內軟，蔬菜仍然保留肉汁，非常好味。然後叫咗幾款串燒：「雞肉大葱串燒」、「豚肉秋葵串燒」、「鹽燒豚肉拖羅」，串燒燒得啱啱好時間，唔會太乾身，感覺到係明火炭燒嘅味道。「甲羅燒」好多蟹膏，係真蟹膏，好香，混入咗蟹肉同埋調味，查喺多士上面食，超正。最後一道主菜，好特別，非常推介，叫做「雲丹拖羅蓉山盛」，賣相好吸引，呢味菜式包含咗三文魚子、海膽、吞拿魚蓉，堆到一座山咁大，下面放咗紫菜卷。食材好新鮮，凍凍地，超多海膽，好鮮甜；吞拿魚蓉有入口即溶嘅感覺，超好味，份量十足，好抵食。整體，價錢唔貴，有呢個食物嘅質素，一定會再嚟光顧。