老闆火鍋冰室

营业中

休息中

食過咁多唔同火鍋，最後都係覺得港式火鍋最好食，今日嚟到老闆火鍋冰室，見佢裝修得好有八十年代嘅茶記風格，一於試吓先。好，坐低睇吓有咩好食先！重慶雞煲，一打開個蓋，就聞到好大陣麻香味，同芫茜嘅香味。有陣時出面雞煲啲雞會好老，但佢又唔會喎，雞件食落好滑，唔會老，醬汁好濃郁，有唔同香料嘅味道，爽口嘅洋蔥沾上醬汁簡直係一流！雪花肥牛，唔會切到好薄，牛味都幾濃，煮完之後都仲食到，而且份量都幾多吓。黑豚肉花腩片，食落唔會韌，腩肉嘅油脂分布平均，唔會太肥，咬落又有油，唔錯。廣島蠔，煮完之後都唔會縮水縮得好勁，咬落有汁水，微微嘅海水味，鹹鹹地，蠔味重。牛柏葉，烚完之後索晒啲湯，爽口，食得出好新鮮。油麥菜，鍾意食辣嘅朋友仔，就一定要試吓喇，油麥菜吸晒啲湯汁，好刺激！凍檸檬冬瓜茶，食完辣嘢，飲返杯嘢降吓溫都好，飲落酸酸甜甜咁，中和返。