燒蝦蝦 (金福閣） (已結業)

最近好興燒海鮮，我梗係都要去湊吓熱鬧啦！知道元朗有間好出名燒蝦嘅，趁放假又去玩下！呢度採取放題形式，2.5小時任飲任燒，夠晒時間慢慢燒海鮮🦞！依呢度最出名係自己夾三晚大頭蝦，呢頭夾起呢頭就凍暈佢就可以搦去燒！有得玩又有得食！ 未試過以為好容易，原來啲蝦真係好活潑，仲彈得好遠，要夾到佢哋上嚟都要花啲時間㗎😂咁沙猛嘅海蝦燒完即食就梗係鮮甜啦！而且燒烤架有兩層，雙層就可以放蝦同埋魚，底層放貝殼類就最好啦，燒帆立貝同埋生蠔勁快熟😂👍👍呢度除咗蝦之外仲有好多海鮮選擇㗎，有專人不停喺度洗海鮮，所以海鮮嘅Refill速度都好快！譬如有鮑魚、生蠔、花甲、大蜆、沙白、仲有幾款魚類任揀，試咗大眼雞同埋黃花魚都幾好味！海鮮我就最鍾意食帆立貝，加埋牛油同埋蒜蓉去燒真係冇得彈！老公就鍾意食生蠔，生蠔味夠重，所以又係加蒜蓉同埋牛油去燒就搞掂！除咗海鮮之外仲可以揀好多唔同款嘅蔬菜、或者豬仔髀呀、雞翼呀、同埋羊扒羊架都有得揀，食物款式都算OK多！