彩虹小食串燒專門店 (已搬遷) 新店位置

入大埔行山好開心，行完山搵嘢食仲開心，因為黃埔手足好勇武，幫襯呢度嘅黃店，振興經濟，絕對係榮幸之事。雖然呢度食串燒為主，但係全晚食得最舐舐脷嘅係呢窩時令膏蟹海鮮粥，兩個人食，每人起碼有兩碗，才不過九十八蚊，超抵食。海鮮粥煲得好綿，亦非常鮮味，仲有大蜆同隻半膏蟹畀你慢慢吮，正到冇朋友👍。串燒方面，我哋叫咗雞皮，豬頸肉，黑豚肉，雪花霜降一口牛，豆卜，菠蘿，原隻茄子同初戀芝士撞棍，全部都屬正常水準，唔錯，唯獨係最後嗰樣芝士撞棍（即係炸響鈴上面鋪塊芝士）， 腐皮燒完後變得有啲靱，口感一般。所有串燒都可以自選辣度，我哋叫咗 BB 辣，但係食落口一啲辣味都感覺唔到😂，所以如果你食得辣，建議可以叫高一兩級。最後都想一提佢哋嘅飲品，質素又係好高，我飲嘅 852 咸濕沙冰，即係桔仔水嘅沙冰版，酸酸哋甜甜哋鹹鹹哋，非常好飲😋；友人叫咗杯性感檸蘿柚沙冰，據佢所講，檸檬同菠蘿味都突出，西柚味相對較少，不過整體嚟講都幾好飲。