川辣皇 (已結業)

今日又去左食川菜，去左川辣皇食二人餐都只係$298仲要唔洗加一，有好多款川菜可以揀，仲有乾鍋，超抵又好味，套餐包括：泡椒魚皮魚皮非常之彈牙，連埋青瓜絲一齊食有一陣鹹香味，食完之後就有股泡椒辣味嘅後勁上嚟小小辣好惹味。京蔥爆牛肉牛肉炒得好香吸收哂京蔥嘅香味，而且一啲都唔會覺得韌，食落去甜甜鹹鹹咁。水煮牛蛙呢個水煮湯做得非常出色，煮到湯入邊嘅田雞超級辣超級入味，入邊一邊啲芽菜同寬粉更加辣，鍾意食大辣嘅朋友一定要叫。自選乾鍋三款餸我哋叫咗雞肉萵筍同埋肥腸，每款送嘅份量都唔少，仲要係新鮮炒起熱辣辣出晒煙咁上菜，最推介係雞肉，因為佢最完美咁吸收晒乾鍋嗰個香辣嘅味道。黃金糍粑炸到金黃色咁，食落去非常煙靭。大大杯凍檸茶 $32食辣嘢最怕唔夠嘢飲，呢度嘅檸茶超級大杯，食完辣攞嚟解辣一流。