今日喺銅鑼灣時代廣場後面就比本兔遇到間好有驚喜嘅烏冬小店，絕對值得推介俾大家
小店中文名叫做<八沢>，雖然沒有華麗嘅裝修，但是基本嘅光猛和清潔都是做得非常足的
其實會入去幫襯嘅主要原因，就係因為喺門口見到依碗<黑松露忌廉海鮮烏冬>！！！本兔一坐低就二話不說，立即點了
〈咸檸7〉
喺未有得食烏冬之前，炎炎夏日當然要叫番杯透心涼凍飲~~選了<鹹檸7>絕對是沒錯的！你看粒咸檸有幾大粒
〈黑松露忌廉海鮮烏冬〉
等左一陣終於有我期待已久嘅烏冬到來，第一眼見到咁大碗湯，以為係會水流流稀稀薄薄，其實有少少失望的
但係飲一啖先知原來執到寶！！帶有黑松露香氣既湯底口感又香又幼滑，味道亦都好香濃醇厚，但又唔係嗰種會令你好滯的湯底，超好飲的！
試完湯底當然要試吓真正嘅主角~烏冬！！
烏冬爽滑得來又夠彈牙，順滑到<口雪>一聲就索哂入口，絕對係本小兔食過最好食嘅烏冬之一
另外仲有好多片既厚切香滑三文魚同埋幾粒大大粒嘅原隻帆立貝，真係令到本小兔非常非常滿足
〈黑蒜灸燒極濃黑豚肉烏冬〉
<獅子老公>唔特別愛好海鮮，所以就試吓黑豚肉，見到湯底面頭浮滿左黑蒜油就知道有濃郁
湯底同樣都係香滑濃厚，但加上了黑蒜油嘅香味就變得更加惹味誘惑，令人欲罷不能
再加上蛋味濃郁嘅滑溜溜溏心蛋和帶微微碳焦香既灸燒半肥瘦厚切日式叉燒，<獅子老公>亦同樣表示非常滿足
〈濃湯雜菜〉
本小兔吃飯又怎可能沒有菜菜呢
新鮮蔬菜和菇菌都各有好多，絕對唔係將啲菜頭菜尾求求期期加埋一齊就當一個餸拎出來賣，加埋濃厚香滑嘅湯底真係健康得來又夠好味
總結：誠意良心小店，食物質素亦非常之高，價錢合理，絕對會再來光顧
