火車頭越南餐室 (朗豪坊)

营业中

休息中

每次經過朗豪坊都見到呢間越南餐廳超多人流，一試發現原來好耐之前食過位於大坑既總店，當時已經好岀名排哂隊，怪不得進駐旺角後人流更加多！叫左兩個前菜，第一個係越式蒸粉包。用蒸籠裝住好似食緊點心，就算係露天既環境都唔怕凍。味道較淡，主要靠炸蒜同醬汁吊味。第二個就係牙車快沙律。用杯裝住睇落唔大兜，但食食下份量都幾大份。食呢個餸記住要撈埋啲汁食，因為杯型設計啲汁跌哂落底。撈埋啲汁酸酸地好清新，岩哂做前菜。越菜主食當然要嗌香茅豬扒撈檬。豬扒都幾多，而且非常入味。檬粉夠凍，同埋咬落唔粉，加埋魚露撈埋，雖然簡單，但真心好食。等左好耐終於到重頭戲，芝士蒜蓉牛油焗大頭蝦！因為即叫即焗，所以預左需時較耐。一上枱相當驚喜，因為真係好大隻，即使係大頭蝦都有好多蝦肉，唔講以為食緊龍蝦。蝦既表面焗得好香，濃濃既芝士蒜蓉牛油味，再加上些少焦香味，入口係非常正。但係蝦肉本身既味道唔濃，所以食哂表面既蒜蓉，味道就相對較淡。