正品蕃茄湯麵店 (已結業)

荃灣有兩間正品蕃茄麵，一間千色店附近，一間喺荃灣廣場對面，建議大家去荃灣廣場果間，地方大啲、檯同檯之間冇咁迫，最重要人唔多，次次去幾乎都係兩人坐四人檯，感覺食得舒服啲😉（不過夏天會多啲烏蠅，拍極都唔走😅）店內有飯、麵同常餐揀。麵方面有套餐，亦都可以好似車仔麵咁揀餸。蕃茄湯底有4款，西芹蕃茄、黑胡椒蕃茄、風味辣（有少辣到大辣）同蕃茄肉碎。麵方面，佢地推介手打蕃茄麵，但都可以轉常見嘅米粉、米線果啲。每次我都會揀炸墨魚卷蕃茄風味辣(中辣)米線。個湯因為落左好多蕃茄煲嘅關係，蕃茄味非常濃，但唔係濃到杰撻撻果種。你會食到好多蕃茄蓉同原隻切塊蕃茄，間唔時仲會食到洋蔥同薯仔添。雖然冇揀佢招牌嘅蕃茄麵，但個米線我覺得比平日麵店嘅好食彈牙。墨魚卷即炸好脆身同熱辣辣，而且一碗有4條，同人share黎食都得。油菜方面，同一般麵店油菜差唔多，千色店果個就冇腐乳通菜揀。之前都試過嗌小食，見佢地墨魚卷炸得幾好，就叫左個炸魷魚鬚，點知炸得好老。炸小雲吞就幾好味