逸之燒 (已結業)

好耐都冇食日本嘢啦，今日放工同朋友去食日本餐廳，期待咗好耐。鹽燒豚肉芝士年糕串：每次去都一定要食呢個串燒，芝士年糕非常之香，加咗鹽嘅豚肉包住啲年糕一齊食，又creamy又鹹鹹地，我勁鍾意食佢呢間舖頭嘅呢一隻串燒。A4和牛壽喜燒：和牛切到一片片薄薄地，擺落去火鍋入邊加埋隻蛋煮一陣，拎上嚟食牛肉好滑，而且牛味非常濃郁。飲埋啖湯甜甜地，仲可以加啲菜一齊煮，成個煲食完好令人滿足。我哋仲加咗蔬菜盤同埋烏冬添。三文魚刺身：三文魚刺身係厚切，脂肪同肉嘅分布好平均，魚油甘香，好好食。油甘魚壽司：魚肉切出嚟好新鮮，紋理清晰可見，厚度平均，口感不俗。今晚食完返去要努力減肥，不過咁好味都值得！