新肥泉海鮮大排檔

营业中

休息中

今日難得呀媽有得早收工，同佢去返屋企附近食海鮮，我地今次揀左呢間位於官涌體育館附近既新肥泉海鮮大排檔，因為地點非常就腳而且價錢合理。一講起大排檔，本身都有啲擔心會唔會好污糟，點知一入去到比想像中極為乾淨，而且坐得好舒服，又唔會太熱重要有電視睇😍，餐廳用QR code落單，非常先進。XO醬爆鮑魚煲一共有六隻鮑魚，一上菜已經好香XO醬味，食落鮑魚好鮮甜同彈牙，而且每個鮑魚都大大隻，咬落好淋，絕對唔會咬崩牙。另外，除左鮑魚之後，下面全是炒雜菇，感覺好健康，配搭得好好。西蘭花炒象拔蚌片西蘭花食落有一陣酒香味，而且咬落非常爽口，象拔蚌輕輕炒過，非常煙韌，口感十足，配上白飯簡直一絕。薑蔥生蠔煲超級香薑蔥味，一定要提既係生蠔有成十隻，而且每隻大大粒，超肥美，每一粒蠔都充滿住薑蔥味，食落完全唔腥，係我非常推介既一道菜。