豐生水起 (已結業)

Item: 豐生水起
Rating: 3
Author: 奧志雷

Hot Pot Market

80 食记

味道

环境

服务

卫生

抵食

4985

大埔

$201-400

粤菜 (广东) 港式火锅点心中菜馆

奧志雷

等级4

2.1K

日常家庭茶聚火鍋勇闖新店！果然係火鍋店，沒什麼點心及炒粉麵飯供應，而且無任何燒味，唔怪得只有小貓三四隻。睇落以客串形式做埋午市埋點心啫，明白的。大把檯隨便坐，最衰梳化位已滿，求其坐圓檯啦。

雖則上水粉嶺大埔舖位都被州民水客自由痕炒到黐孖筋的貴，望望個 menu 發現個價位真係有點偏高喎。埋單每人四舊水，千六蚊有找食飽飽，色香味較滿意好味道的只有黃油雞、活蝦、本地牛、手打雜丸，其他都不過不失合格過關，唔抵食唔抵食。

琴晚係九龍城燚火鍋飲埋啤酒仲嘆原條活水刺生、原條象拔蚌刺生、靚本地牛、靚手打丸、花膠雞湯、麻辣湯、等等等等！同樣每人四舊水，但待遇天淵之別，同一收費有更多享受！

食材新鮮度、味道、質素都蠻滿意的，最討厭係坐得超超超級非常好很唔舒服，搞到我十分狂燥，好鬼忟憎呀！張檯太細頂手頂腳，放唔得多野，好鬼迫夾！比埋茶机幫助不大。

每位有骨碟、調味碟、筷子架、湯羮、網篩、茶杯各一，再加兩對筷子、兩隻飯碗。還有公家骨碟、湯殼、豉油、茶壼。如果食刺生，每人再多碟 wasabi 豉油！到底有否考慮過、有否計過數呢？空間太細，理應減省一下或用細呎碼的餐具！食到上火，全程黑面。

等足足十分鐘先埋好張單，得幾檯食客又唔係忙，個 cashier 阿嬸係咪應該搞掂張單先做其他野呀？按個電腦制張單就會出黎，對吧？行來行去、出菜、落單、搞冷氣，要我地全家白白呆等，有無搞錯！

侍應們都算十分落力招呼食客，有禮算周到，不過經常聽唔到食客召喚，而且慣性地飄來飄去，完全無細心留意每檯情況，雙眼擔天望地魂不附體。辣椒油，得色水不香不辣，味啖而油膩味重，唔辣枉為辣椒油啦，質素低於水平。

鮑汁鳯爪，滾到鳳爪甩腳皮爛容容有損外觀喎！狠狠一啜骨肉分離，微黏帶滑膠膠。淡淡的稀水鮑汁，浸得鳳爪入味，無過咸反偏甜，不過不失。過過口癮作前菜，損損腳指送下茶消磨時間也不錯。

鮮蝦炸春卷，無咸水角就是但轉春卷啦。竟然用上芫茜蔥做餡，絕無僅有第一次遇到。大大啖咬脆到索索聲，碎非爆開四散，剛炸起勁熱呀！大量豬油塞得滿滿，味道強烈霸道。蝦蓉極少，食不到蝦味，基本上食唔蝦粒或蝦肉。

就算即叫即炸夠晒熱脆卜卜，再滾埋喼汁開胃酸咪咪，質素始終差幾皮。就算演繹獨特，用上鳥籠般的碟盛載上檯，有點浮誇又無功能，仲阻住我地夾黎食，要左轉右轉隻碟搵返個窿伸筷子入去夾出黎，非常唔方便！有一刻我想直接用手費事煩。

水晶鮮蝦餃，大大粒剛剛好塞到我的嘴仔脹卜卜，餃皮通透嚥韌，蒸得完整靚仔，無濕淋淋無爆無裂。蝦仁鮮爽帶甜，意料之外的好評。

蟹子燒賣皇，熱到出煙照樣直接原粒啪入口，越熱越好味道啦！燙燙的咬，爆開肉汁輕流，豬肉鬆散不結實，味淡偏油，香甜不足，麻麻地。

蠔皇鮮竹卷，罕有能夠做到腐皮那麼乾爽、香口、嚥韌、清爽！不像一般的索晒汁且濕淋淋黏黏的感覺，師傅廚藝內功不錯。蠔汁半透味鮮而不濁不過咸，配埋香甜肉碎味菜可口健康。

潮州蒸粉果，餐牌張相明明係蒸餃，那裡似潮州粉果呢？根本就係有蔥的菜肉餃，連味道都一模一樣。厚厚黏黏的餃皮，包著甜美肉球菜粒，竟然幾好食噃。蒸餃、煎餃梗係要配辣味豆瓣醬啦，無提供？

巧製叉燒包，包皮不夠軟塾，不夠彈性，包味不夠芳香。有點鞋，有點硬，淡淡的。淺橙色的叉燒餡，偏乾不夠汁，淡淡的味道撈埋包皮就更淡。我要好多好多好多叉燒醬架，要爆汁滾熱辣，要包皮鬆軟，要麵粉香甜囉！

鳳爪排骨飯，好大碗飯喎，飯真係真係非常多，要食幾啖飯送一粒排骨。濃味蠔醬鳳爪皮爽爽，排骨肉質鬆化，充滿豆豉香味，普通平凡無期待，完全無好想食既衝動。濕濕的飯粒，愛軟飯的食家十分適合。微弱的飯香，略咸的豉油，食兩啖夠晒。

特別的醬料給特別的您，咖哩、沙茶、麻辣、沙嗲。我打邊爐從來未用過，雷式混醬只需要指天椒、生蒜、炸蒜、青蔥，撈埋豉油搞掂。

胡麻醬冰菜沙律，見 menu 寫住冰雪菜，菜表面黏著的是鹽結晶體，所以食落有點點咸香，質地索索聲的，撈上胡麻醬同吃，清爽健康的沙律。冰菜一向人氣旺盛，可能因為其外觀獨特，但我個人覺得食味一般。

黃湯鴛鴦花膠雞鍋細，侍應帶著沙漏、雞件及湯鍋前來，將所有雞跣落鍋中，開爐用沙漏計時，叮囑夠鐘就可以熄火享用喇。夠鐘起動！

淨黃色的湯汁，鮮豔奪目，大量鳳脂香氣撲鼻。分好湯有雞有花膠有魚肚，急急搶碗先飲為快。湯汁特濃厚厚黏黏，微膠的質感，雞味濃到有點咸，做湯飯、湯河必定非常出色。

鮮雞甜味突出舔舔嘴，雞肉肥美滑嘟嘟啖啖肉，沾上指天椒豉油無得頂！綣綣的花膠片咬落似鵝腸，份子料理？其形不是其味？有趣得意。魚肚質素更高，索湯爽彈，精華四射好好味！

本地鮮雞子，何解腍劈劈既？應該飽滿彈彈架喎，有半都洗爛左呢，烚到肉汁蛋白質都流失咯。幸好蛋味仍然濃厚，脆皮爆開多汁甜甜的，無可抗拒的味道！成碗雞子都係我，全部都係我架，唔好同我掙，滿足滿足！烚得完整，所有精華保存，啪幾粒入口，連環口中爆開，放炮仗一樣，感覺興奮莫明！

本地手切牛頸脊，嫩紅色夠吸引，牛脂分佈平均又不會太肥，比一般的切得厚，就係依個厚度喇，我至愛！拖兩拖粉紅色滾上指天椒豉油整塊啪入口，色澤漂亮，肉汁四溢閃令令，濃厚牛肉味牛脂香佔據所有味蕾。充滿彈性有嚼勁，牛肉汁飛射，脂肪甘香無比，牛甜味環繞齒舌之間，沒有挑剔的理由，我比您滿分 ﹗

鴨紅，見到 menu 上寫住即時雙眼發光，梗係要啦﹗但我想得太理想喇，近來食左多次台式火鍋，嫩滑多汁勁彈的鴨紅不在這裡！硬實的質地，內外皆鞋，好采不羶不腥，平平凡凡，似豬紅多過鴨紅。

海中蝦，生猛游水腳印印，萬馬奔騰十分跳脫，齊齊 8 隻一鑊熟省時省能源，合乎經濟效益。雙眼望實唔好烚過熟，大滾 1 分鐘就剛剛好。翠紅色狀甚誘惑，鮮甜彈滑蝦汁澎湃，蝦膏甘香出眾，全晚最好食除左牛就是您﹗

美國桶蠔，我每次都擔心會太大隻，大隻未必一定好，越大就越無鮮蠔味道，有渣又有沙。只能沾上指天椒豉油吃掉淡味肥美蠔肚，起渣裙邊及帶子位都要吐掉，無辦法。呎碼都大左少少，裙邊及帶子都起晒渣，再見吧！蠔肚脹卜卜肥美結實彈滑，整個咬掉，入口爆破！兇湧蠔汁在嘴內打滾，淡淡鮮蠔味樸素動人。如果大桶有 6 隻，依個 size 最甜美嫩滑，試過大桶得 4 隻，巨型到嚇呆，質素插水低檔。

脆鯇骨腩，師傅邊處鄉下呢？我打左幾十年邊爐都未見過厚切脆腩喎！留意不要烚太耐，縮起即食，掉到雷式混醬游游水再嘆，魚脂豐富甘甜非凡，魚皮魚肉爽脆，食得開心過足癮。非常鮮甜，非常爽脆，但多骨到死呢，要續條續條細骨挑走啊！腩位不是一條大骨的嗎？明顯全部係背脊，何來魚腩 ﹗師傅知唔知肚腩係邊呀？

白鱔片，刀功了得，非常利害，每片厚薄及大細都非常平均起雙飛，排列整齊有序，靚靚仔仔出埋。新鮮到又爽又彈，甜而不腥高質演繹，沒有青味沒有泥味，肥美可口鱔脂清香，唔連食幾片都唔得！

八寶臨門鮮手打丸，鮮蝦丸、鮮雞丸、墨魚丸、豬肉丸、羊肉丸、鯪魚丸、潮州魚蛋，鮮牛丸濃濃陳皮味好有趣喎。款款頂級可口彈滑多汁，足料無搵笨無得輸，係鯪魚球有點偏腍偏水，誠意推薦必食之選。

手打內蒙古羊肉丸，我細細個已經非常期待有羊肉丸食架喇，早前直頭想自己親手買新鮮羊肉返屋企做。緣份到，自然有得食，太好啊，真係可喜可賀！完全意料之外，令我對羊肉徹底改觀，羊肉原來可以如此彈滑鮮嫩，如此甜美多肉汁，我真係孤陋寡聞啊！

驚喜的味道，聞落散發少少羶味，食落只甜不羶喎。肉丸富有超強的彈力，肉汁不停滲出來，還混有脆卜卜軟骨。夾雜孜然的味道，超級十分好很好味。如果配上麻辣湯堅係不得了呀，要食返兩打先夠喉！

北京餃子，橙撞綠非常鮮豔開胃的顏色，最敞食味平凡一般。因為顏色鮮艷好鬼靚，所以叫黎試試。何解 menu 沒有寫上用什麼餡料？無所謂，估計都係菜肉餃啫。果然係菜加肉的餃，細妹話菜有苦澀味好難食。我就唔覺有，只食到菜絲脆卜卜，有點咸似椰菜。爸媽覺得似菜甫，餃子餡用菜甫？醃蘿蔔應該唔會掛。餃皮滑潺潺，菜多肉少，我這個食肉獸當然不喜歡。

豆品組合盛，鮮腐竹滑滑的，豆香突出清甜。響鈴拖一拖湯，半濕半脆可口致極。豆腐卜山根，外皮嚥韌香口，吸盡特濃花膠雞湯精華，無得頂！蜂巢糕，輕煙飄飄熱辣辣上檯，不吃甜的我都好奇試啖。清淡甜味不濃不嗆，似黏黏的黑糖馬拉糕。